Literatura do Brasil no Día do Libro Infantil e Xuvenil

Un ano máis na Biblioteca Municipal Ágora celebramos o Día do Libro Infantil e Xuvenil co CEIP Raquel Camacho e o CEE Nuestra Señora de Lourdes Aspronaga cunha proposta de promoción da lectura a través da integración: Ti tes moito conto!

Se o ano pasado a temática escollida polo IBBY para esta conmemoración foi “Moitas culturas, unha historia“, nesta ocasión xirou arredor da literatura do Brasil baixo o lema “Érase una vez…“. E ao Brasil viaxamos a través dos seus autores, a súa música e as súas historias. Seis foron as equipas que se conformaron para traballar os seguintes materiais:

Primeiro libro de Monteiro Lobato para nenos, “A meniña do narizinho arrebitado” (1920)

– Cancionero infantil del papagayo, Samba lelé / recopilación, Magdeleine Lerasle; dirección musical, Paul Mindy

– Yaci y su muñeca / Conto popular ilustrado por Gloria Carasusan

– El perro del cerro y la rana de la sabana / Ana María Machado ; ilustracións de Peli

– Niña bonita / Ana María Machado ; ilustracións de Rosana Faría

– Jararaca, Perereca y Tiririca / Ana María Machado ; ilustracións de Rosana Faría

– Cancionero infantil del papagayo, Marinheiro só /recopilación, Magdeleine Lerasle; dirección musical, Paul Mindy

Ao longo dos meses de febreiro e marzo os rapaces e rapazas de 6º de Educación Primaria do CEIP Raquel Camacho e o alumnado de CEE Nuestra Señora de Lourdes-Aspronaga prepararon as representacións que o venres 1 de abril viñeron a presentar á Biblioteca Municipal Ágora para celebrarmos xuntos este día.

A xornada comezou con ilusión e moita alegría, da man do alumnado de 6ºA do Raquel Camacho que nos deleitou co Samba Lelé.

O punto tenro chegou da man da historia da nena india Yaci e da súa boneca Curumín, feita con mazorcas de millo. Representada por alumnado de CEE Nuestra Señora de Lourdes-Aspronaga e alumnado de 6º do Raquel Camacho.

Descubrimos que se poden facer moitas cousas cunha mazorca de millo, dende unha torta ata a nosa propia boneca!! Ai, cantas Curumín haberá polo mundo!

O momento máis divertido vivímolo grazas ao alumnado de 6ºB do Raquel Camacho que nos achegou a historia do can do cerro e da rá da sabana.

Estes dous animais enrédanse nunha tremenda discusión para demostrar a súa valentía. O resto de animais entran en escena e fan as súas apostas. Quen será o máis afouto dos dous?

E depois das risas, o alumnado de 6ºA do Raquel Camacho compartiu con todos nós unha poética historia sobre a supervivencia e o deterioro ambiental da man dos seus protagonistas: Jararaca, Perereca e Tiririca, unha serpe velenosa, unha rá e unha herba capaz de nacer e sobrevivir no lugar menos pensado.

A xornada continuou da man do alumnado de 6ºB do Raquel Camacho que nos fixo partícipes do seu Marinheiro só, recollido no Cancionero infantil del papagayo.

Eu não sou daqui

Marinheiro só

Eu não tenho amor

Marinheiro só

Eu sou da Bahia

Marinheiro só

De São Salvador

E o tempo de intervencións dos rapaces e rapazas rematou con Niña bonita, interpretado polo alumnado do CEE Nuestra Señora de Lourdes e alumnado de 6º do Raquel Camacho.

Houbo algún que outro problema técnico propio dos directos, sobre todo cando van asociados a novas tecnoloxías, que non permitiu visibilizar todo o traballo que había detrás. Aínda así puidemos gozar da historia do coello branco que queda prendado da fermosura dunha nena negra, cal será o seu segredo para ser tan bonita?

O peche da celebración veu da man de Caxoto Contacontos, que compartiu con nós unha selección de lendas e tradicións do Amazonas e do Orinoco.

E ate aquí a crónica da nosa homenaxe á literatura do Brasil para celebrar o Día do Libro Infantil e Xuvenil. O máis bonito de todo foi compartir, traballar en equipo e descubrir que entre a rapazada temos uns cantos contadores de historias profesionais!

Mil grazas a todos ás direccións e docentes do CEE Nuestra Señora de Lourdes e do CEIP Raquel Camacho que fixeron posible outro ano máis Ti tes moito conto! Pero sobre todo, moitas grazas ao alumnado que participou da proposta polo esforzo e ilusión postos nela!

Acerca de nmartinezrey

Creo firmemente no poder transformador da sociedade que teñen as bibliotecas e a lectura, por iso desenvolvo a miña labor profesional como bibliotecaria. Motívame especialmente a aprendizaxe continua, o que me levou a formarme en áreas como bibliotecas escolares, community management e coaching.

Ver todos os artigos de nmartinezrey →