A saúde integral, protagonista dos roteiros xuvenís polo barrio
A principios deste mes de marzo comezabamos na Biblioteca Ágora cos roteiros de saúde e deporte, unha proposta dirixida ao alumnado de 3º ESO que xa leva en marcha varios anos en colaboración co IES Agra do Orzán e coa que traballamos valores vinculados cunha vida saudable.
“Garantir unha vida sa e promover o benestar para todos en todas as idades” é un dos obxectivos da Axenda 2030 para o Desenvolvemento Sostible , misión na que as bibliotecas públicas poden e deben xogar un papel fundamental tal e como recolle a Federación Internacional de Asociacións e Institucións Bibliotecarias (IFLA) no seu documento “Acceso y oportunidades para todos: cómo contribuyen las bibliotecas a la Agenda 2030 de las Naciones Unidas”.
Apenas pasaron tres semanas do último roteiro polo barrio realizado cos rapaces e rapazas do Agra I para traballar a saúde como concepto integral e descubrir diferentes disciplinas deportivas na nosa contorna, quen nos ía dicir a nós neses días que agora estaríamos vivindo un estado de alarma por crise sanitaria a causa do covid-19?
“A saúde é un estado de completo benestar físico, mental e social, e non soamente a ausencia de afeccións ou doenzas”. Definición extraída do preámbulo da Constitución da Organización Mundial da Saúde (OMS).
Desde o noso confinamento, queremos render unha humilde e pequena homenaxe a todas aquelas persoas que fan posible cada ano a realización dos roteiros, facendo un recordatorio do percorrido realizado os días 3 e 9 de marzo coas aulas de 3º ESO-B e 3ºA e PMAR.
Kiusao Kung Fu Galicia
Da man do Sifu Juan Saldeño, fisoterapeuta e mestre-director da escola, achegámonos á técnica e práctica do wing chun kung fu.
Tivemos ocasión de descubrir que a praxe desta arte marcial chinesa orientada á defensa persoal, non só aporta benestar a nivel físico senón tamén a nivel mental, ademais de facilitar o desenvolvemento de capacidades para a vida diaria tan necesarias como: concentración, constancia, esforzo, visión e perspectiva á hora de facer fronte a obstáculos.
E, entre algunhas das técnicas que o sifu Juan ensinou ao alumnado, atoparon no wing chun unha ferramenta coa que mellorar en confianza, estima e responsabilidade, vencendo os propios medos e inseguridades.
Jugger Coruña na Biblioteca Ágora
A explanada da nosa biblioteca desde hai un tempo xa é o campo de adestramento de Jugger para os mozos e mozas da cidade. E foi aquí, na biblioteca onde Damián, Jorge -membros do equipo Black Cats-e César -membro do equipo La Guardia Varega– explicaron ao alumnado as orixes, o regulamento e o equipamento deste deporte.
“Trátase dun deporte mixto de contacto entre dous equipos de cinco xogadores, orixinado en Alemaña a principios da década dos 90. Aínda que en esencia é moi similar ao rugby, engade elementos de esgrima, minimizando así o contacto entre xogadores. A finalidade de cada equipo é facerse coa pelota no centro do campo e levala ata a base contraria para marcar un tanto”. Federación Española de Jugger
E despois da parte teórica, os rapaces e rapazas tiveron ocasión de desfrutar da praxe do Jugger na explanada da biblioteca. Tralos roteiros, este deporte de equipo gañou adeptos na cidade!
Centro Yoga Pasión
Da man de Ana María e Laura, achegámonos á disciplina física, mental e espiritual do ioga, comezando pola importancia da respiración e da toma de conciencia do noso corpo e dos nosos pensamentos.
Explicáronos algunhas das modalidades que se imparten no seu centro (Kundalini, Integral), así como tamén os beneficios a nivel físico e mental da práctica do ioga como o aumento da flexibilidade, forza , resistencia, equilibrio ou a mellora da atención , concentración e claridade mental.
Incluso tivemos ocasión de practicar algunha das posturas que conforman a práctica física desta disciplina.
Azteca Box
Na escola de boxeo Azteca Box rematamos o noso percorrido dedicado á saúde e o deporte. Alí recibiunos Luís Suárez, adestrador nacional de boxeo co que vimos colaborando desde os inicios da Biblioteca Ágora.
O alumnado tivo ocasión de descubrir que a través dun deporte como o boxeo, ademais de traballar a nivel físico a resistencia, a forza, a velocidade ou a coordinación, desenvólvense valores fundamentais como a humildade, a constancia, a capacidade de traballo, o esforzo e a concentración.
Rematamos practicando algúns dos golpes de boxeo e recordando a importancia do respecto. En palabras do propio Luís: “no boxeo cando adestras o teu obxectivo é mellorar. Cando compites o teu obxectivo é gañar, que non humillar. Por iso a clave é respectar sempre, tanto ao compañeiro como ao rival”.
E ata aquí o noso percorrido no que desde a Biblioteca Ágora traballamos imprescindibles para o desenvolvemento dunha vida saudable como é a práctica deportiva, abarcando esta a esfera física, a mental e incluso a espiritual.
Desde o confinamento enviamos o noso agradecemento a todas as persoas que fixeron posible a realización do mesmo. Grazas a toda a comunidade educativa do IES Agra do Orzán, en especial a Milagros. Grazas Juan, de Kiusao Kung Fu Galicia. Grazas Damián, Jorge e César de Jugger Coruña. Grazas Ana María e Laura de Centro Yoga Pasión. Grazas Luís, de Azteca Box. E grazas aos alumnos e alumnas que participaron da proposta, sigamos creando comunidade, unha biblioteca de todxs para todxs!!
Moitos ánimos e fortaleza emocional para levar estes días o mellor posible!
Acerca de nmartinezrey
