Suma Ágora

A Biblioteca Ágora, cos barrios da súa contorna

Celebramos coas ANPAS a diversidade

No noso país a data do 17 de maio ten unha referencia clara, a celebración das Letras Galegas. Desde 1967 este é o día do ano no que galegos e galegas poñemos en valor o feito de sermos un pobo con lingua e cultura de seu, a través tanto da homenaxe institucional a unha figura da nosa literatura como tamén da celebración cívica de actos reivindicativos e de divulgación cultural polo conxunto do territorio.

Mais a data, sendo para nós tan galega, coincide a nível mundial con outra á que queremos tamén traer ao primeiro plano e facer igualmente nosa: o día internacional de loita contra a homofobia, a lesbofobia e a transfobia. E isto é así desde o 17 de maio de 1990, momento no que a asemblea xeral da OMS aprobou a retirada do código 302.0 (relativo á homosexualidade) da Clasificación Internacional de Doenzas. É moi importante sinalar como, a pesar do recoñecemento da homosexualidade como unha manifestación da diversidade sexual, as lésbicas, gais, transexuais e intersexuais (LGBTI) aínda sofren na actualidade, de moi diversas formas, as consecuencias da homofobia. E iso é algo que nos agride a todas as persoas á marxe da nosa opción sexual.

 

867894

 

Na Biblioteca Ágora pensamos que contra as discriminacións, ademais de leis que protexan os nosos dereitos, é sempre conveniente aplicar a terapia preventiva da educación, o coñecemento e a cultura. E facelo, por certo, desde que somos ben pequeniñ@s e as nosas cabezas aínda non están contaminadas por prexuízos, tópicos e relatos discriminatorios.

A partir desa convicción é que se deseñou e celebrou nas últimas semanas, desde o grupo de infantil da Biblioteca, unha actividade orientada aos nenos e nenas de entre 3 e 6 anos dos colexios da nosa contorna, a través da ANPA do CEIP Raquel Camacho, da ANPA As Pedreiras do CEIP San Pedro de Visma e da ANPA Agarimo do CEIP María Barbeito.

Tratouse de tres sesións con tres grupos de nenos e nenas, nas que se abordaron a estima da condición propia, o respecto aos demais e a igualdade entre todas as persoas, a través de contos que tratan a temática da diversidade e da diferenza. Tres con tango, Elmer, Rosa Caramelo e A xoaniña e o seu puntiño foron as obras escollidas, sobre as que as nosas compañeiras construíron as súas sesións adaptándoas ás idades do alumnado.

 

post coeducación (2)
post coeducación (4)

O resultado foi, do noso punto de vista, moi positivo, especialmente polo gratificante que resulta comprobar a naturalidade e a normalidade coa que nenos e nenas participan das historias, con miradas limpas de prexuízos e quedando co fundamental: o amor entre Roy e Silo, os dous pingüíns macho protagonistas de Tres con tango; a vivencia da diferenza da cor de pel que experimenta Elmer con respecto ao resto de elefantes;  a rebeldía das “elefantas” de cor rosa caramelo fronte ás coercións que afogaban o seu día a día e a súa vontade de poder comportarse en igualdade aos elefantes machos; a autoestima recobrada pola xoaniña cando aprende a ver a súa diferenza sobre as demais xoaniñas como un elemento sen maior importancia.

post coeducación (3) post coeducación (1)

 Traballar en valores e tratar sen complexos e de xeito natural este tipo de temáticas co alumnado dos colexios da nosa contorna entendemos que é unha decisión que convén desenvolver e manter no tempo, empregando sempre como punto de partida eficaz as historias e os contos literarias cos que hoxe en día podemos contar bibliotecarias, pais e nais e profesorado. No noso caso é xa o segundo ano no que desenvolvemos esta iniciativa, e o resultado da experiencia anímanos a continuar coa liña comezada.

Por todo o anterior, neste 17 de maio, do mesmo xeito que animamos a todas as galegas e galegos a rexeitar as agresións contra a nosa lingua, pulamos porque a diversidade sexual e de xénero sexa contemplada como tal tanto na esfera social e educativa. Como dicía un coñecido lema de hai anos, somos diferentes, somos iguais! 

Advertisements

Acerca de xavier campos

Traballo na Biblioteca Ágora, da Coruña. Interésame todo o que ten a ver coa cultura como ferramenta para o cambio social. Creo nunha Biblioteca que mire máis alá de si mesma.

5 comentarios en “Celebramos coas ANPAS a diversidade

  1. Lucía
    Maio 12, 2015

    Fantástico, pero non esquezades as bisexuais… o B de LGTB 😉

    • Lucía
      Maio 12, 2015

      LGBTI

      • xcampos
        Maio 12, 2015

        Tes razón, Lucía! LGBTI

  2. Anpa Agarimo
    Maio 12, 2015

    Ainda nos queda moito que andar, pero este tipo de iniciativas son o complemento perfecto para acadar o obxectivo. Hai que recordar que ainda existen países no mundo no que se condena coa pena de morte a persoas pola sua condición sexual. Moi triste.
    E xa sen sair do noso pais escoitanse noticias de acoso escolar homofóbico con risco de suicidio en adolencentes. Polo tanto non podemos baixar a garda, queda moito por facer, tanto no sistema educativo como no entorno familiar (este último fundamental).
    Graciñas polo voso traballo e por estas iniciativas.

    • xcampos
      Maio 13, 2015

      Agradécese moito a vosa reflexión, que compartimos por enteiro. Tanto o espazo familiar como o educativo son fundamentais para educar aos nosos nenos e nenas en valores de igualdade e respecto a todas as persoas. Aledámonos moito de que vos gustase…!

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair / Cambiar )

Twitter picture

Estás a comentar desde a túa conta de Twitter. Sair / Cambiar )

Facebook photo

Estás a comentar desde a túa conta de Facebook. Sair / Cambiar )

Google+ photo

Estás a comentar desde a túa conta de Google+. Sair / Cambiar )

Conectando a %s

%d bloggers like this: